#في المدرسه#
أمل بنفعال:ماني ياخانين كيف اتروحو مع بعض من دون ماتقولولي..سخيفين.
حوراء:ههههههه قلت لش بتنقهر و تزعل.
ساره:عاد أني جبت لش حاجه اتراضيش.
أمل:بنشوف.
ساره:بترضي بس غمضي عيونش.
أمل تغمض عيونها:الي يشوفني بيقول أنش بتعطيني الماس مو كيندر.
ساره بستغراب:كيف عرفتي أنه كيندر.
أمل:معروفه أنه كيندر.
حوراء:ايقولو انه من المقاطعات.
ساره:اني ماأقدر ماأشتريه..أصلآ هذي أشاعه لأن مكتوب أنه من صنع أيطاليا..أنما الأعمال بالنيات وأني ناويه أنه أيطالي.
حوراء و أمل:هههههههههههه.
(مرت من جنبهم دانه فنادتها ساره)
دانه:هاااااااااااي.
الكل:هايات.
ساره:دانه ليش شيماء غايبه ؟!
دانه:لأن جواد ماخلاها اتنام الا الساعه ثنتين أو نص من كثر مايسولفو.
(ساره من سمعت أسم جواد سكتت و قعدت اتفكر..حوراء و أمل سولفو مع دانه لين جت لها صديقتها و راحت)
أمل أدز حوراء بلخفيف و تقول لها بصوت واطي:شوفي سارو من قالت دانه اسم جواد وهي ساهيه و اتفكر.
حوراء بنفس الصوت:شكلها طاحت في الغرام لأنها طول الوقت اتفكر.
أمل:أممم ساره اتفكري بويش؟!
ساره من دون أهتمام:ولاشي.
حوراء:ماتلاحضي أنش كل اتفكري..اتفكري بمن.
ساره برتباك:ماأفكر بأحد.
أمل:حتى جواد ولد خالش.
ساره بنفعال:وهذا ويش جاب طاريه..اصلآ ليش بفكر فيه.
حوراء أتطالعها بنص عين:حلفي أنش ماتفكري به.
ساره توقف:مابحلف لأنش سخيفه..تركتهم وراحت جهة الحمامات كرمكم الله.
حوراء:ترا مصخناها.
أمل:لا مصخناها ولاشي لو ماأتفكر به كان حلفت.
حوراء:اي ولله..بس شكلها زعلت.
أمل:أذا أتأخرت بنروح لها.
بعد سبع دقايق جت لهم ساره وسولفو ليما صفرت و كل وحده راحت بيتهم.
_________________
#بيت أبو وليد#
رجعت البيت و كعادتها صلت قرت قرأن اتغذت حلت واجباتها لما خلصت راحت تتصل لشيماء.
ساره ماسكه سماعة التلفون و قبل لا تدق رقم بيت خالها ذكرت كلام ساره و حوراء لها قبل ماتطلع من المدرسه...................
ساره:أذا بتتصلو لي دقو على جوالي لأن يمكن ماأكون في البيت.
حوراء:وين بتروحي؟!
ساره:يمكن أروح بيت خالي عشان أنقل شيماء الدروس.
أمل:عشان تنقليها الدروس لو عشان(تغمز لها).
حوراء:مفهومه أنش رايحه تشوفيه.
ساره:أول مره أكتشف أنكم سخيفين..ولله العظيم مو رايحه عشانه.
أمل:حلفي أنش ماتفكري به و بنصدقش.
ساره:اففف أنتون اتزهقو .........................
ساره(ماأقدر أحلف لهم لأني صحيح أفكر به بس مو بطريقه الي يظنوها..أني محتاره من تصرفاته)
دقت على رقم بيت خالها ردت عليها مرت خالها اتكلمت وياها اشوي بعدين نادة شيماء.
شيماء:هلا.
ساره:اهلين..ها نمتي واجد.
شيماء:ههههه من النعس ماقدرت أقوم.
ساره:أهااا وكيف بتاخذي دروسش.
شيماء:ولله عندي بنت عمه أسمها ساره الله يخليها ليي.
ساره:خلاص عجل تعالي ليي الحين.
شيماء:تعالي انتين..ماباخذ راحتي و زوج عمتي هناك.
ساره:وأني بعد ماباخذ راحتي.
شيماء:أبوي يصير خالش يعني عادي وأذا على جواد فهو مو اهني في المستشفى.
ساره خافت: ليش ويش فيه؟!
شيماء:مافيه شي بس هو داوم من اليوم.
ساره أرتاحت:أهاا.
شيماء:وبيرجع بعد ربع ساعه و على طول بيطلع من البيت يعني مابيكون أهني.
ساره(فكه منه):أوكي باروح أقول لأمي..يللا باي.
_________________
#بيت أبو جواد#
ساره ادق جرص البيت بس ماحد فتح لها الباب...افف ياربي مايحسو الجو حار خلاص فطست..توها بتتصل لشيماء الا تسمع صوت الباب ينفتح.
ساره بأستغراب:السلام عليكم.
تينا:واليكم سلام.
ساره ببتسامه عذبه:وين شيماء؟!
تينا:في كرفه مال هي.
ساره:أوكي روحي قولي لها أني اهني.
تينا:أنتي في يروح كرفه مال هي.
ساره:زين بس بفسخ بوتي.
دخلت تينا..ساره..من متى جابو لهم خدامه أول مره أشوفها..افف ويش فيه هذا ماينفتح(تقصد البوت).
فجئه..جواد:اوه ساره عندنا اليوم.
ساره أتفاجئت بس ماردت عليه...فسخت البوت وتوها بتدخل بس
جواد:لحظه باقولش شي.
ساره متضايقه:نعم.
جواد:تصرفش ذاك اليوم بايخ(يقصد لما كان بيوصلها).
ساره:مو أبيخ من حركاتك.
جواد:أي حركات؟!
ساره بعصبيه:لما خليتني اروح سيارتك و بس (سكتت لأنها أستحت من الكلمه الي كانت بتقولها).
جواد ببتسامه ادل على خبث:و بست ايدش..يتقرب منها أكثر..تبين وحده ثانيه.
ساره اتغيرت ملامح وجهها 180 درجه.
جواد:هههههه أمزح وياش.
ساره بعصبيه:أنت
جواد يقاطعها:أنا أسف ما (رن جواله بغنية<<yeah>>للمغني Achor)
جواد:هلا.
.....:جواد مو كأنك أتأخرت.
(ساره توها بتمشي..جواد مسك ايدها..طالعت ايده فتركها وسوى لها حركه بيده عشان تنتظره يخلص مكالمته)
جواد:أوكي الحين جاي.
.....:مو تتأخر مكياجي راح فيها.
جواد:ههههههه مابتأخر..فمأن الله.
جواد:وين رايحه ماخلصت كلامي.
ساره:مابيني و بينك كلام.
جواد:أنا أسف على الي سويته.
ساره أمتلت عيونها دموع و قالت ببتسامه ساخره:صح النوم شان أنتظرت بعد السبوع الجاي لو الشهر الجاي.
جواد:ماكان قصدي كنت
ساره تقاطعه:قلت لها أنك مابتتأخر حرام يخترب مكياجها من الحر.
جواد(بل معقوله سمعتها)
ساره بأشمئزاز:الحين بتخيس من الحر مع أنها خايسه من دون ماتحتر لأنها بتمشي مع واحد خايس زيك.
جواد:حرام شيماء تعبت نفسها على ماشافت لي هلعطر و أنتي تقولي خايس.
ساره:طحت من عيني.
جواد بوجه خالي من التعابير:ماتهميني.
ساره:أكرهك.
جواد يفتح الباب عشان يطلع:ماطلبت العكس.
{ساره و جواد ماأنتبهو لشخص الي سمع كلامهم و راح من دون مايحسو}
ساره(سخيف تافه حقير مايستحي على وجهه لو كان ندمان كان مابيروح لوحده بنت شوارع خايسه)مسحت ادموعها وراحت لشيماء.
شيماء:هلا ويش فيش أتأخرتي توني بنزل لش.
ساره ولا كأن صار لها شي:من متى عندكم خدامه.
شيماء:من زمان بس كانت في أجازه.
ساره:انزين طلعي دفاترش.
شيماء:اوفف ملل المذاكره.
بعد ماخلصو من كتابة الدروس قعدو يهذرو..رن جوال شيماء.
شيماء:هلا.
جيهان:أهلين..كيف الحال.
شيماء:الحمدلله زينه..أنتين كيف حالش؟!
جيهان:مو زينه جوادو أتأخر عليي و مكياجي أخترب.
شيماء:للحين ماجى لش.
جيهان:يووه من زمان جى وراح..المهم هو قالي أقولش أنه بيجي مع هادي و يبغاش انتين الا أتسوي العصير و اتجهزي غرفته لأنهم بيقعدوا فيها.
شيماء فرحانه:أوكي يالله باي.
ساره:من المتصله؟!
شيماء:خالتي جيهان..هههه مسكينه اتقول ان جواد أتأخر عليها و مكياجها أخترب لأنه كان بيوديها بيت صديقتها.
ساره(ياربي ظلمته وين أودي وجهي الحين فشله)
شيماء:جواد بيجي ويا هادي تعالي وياي أرتب غرفته.
ساره:خلي تينا اترتبها.
شيماء:جواد مايحب أحد يحوس في أغراضه لأن تينا دايم تشيل أغراضه و تحطهم مكان غير..بس طالعيني لاتسوي شي.
ساره:أوكي.
دخلت غرفته وأنبهرت بجمال ديكورها وتنسيقها..شيماء رتبت السرير وساره اتطالع الغرفه أنتبهت على البيانو.
ساره:وااااااو لمن هلبيانو.
شيماء:لجواد..هو يعزف عليه.
ساره:حلفي.
شيماء:مايحتاج أحلف شوفي كمدينته مليانه كاسيتات الحان كلاسيكيه و بعض أغاني هلأيام.
ساره(عمري ماشفت أنسان زيه حيرني غريب عجيب غامض)
شيماء:سارو أشتهيت بايسن.
ساره:ويش الا خلاش تشتهيه.
شيماء:جواد كان يشرب بايسن امثلج..وهذا كاسه.
ساره:مو مشكله أتصلي لجواد قوليله يشتري لش.
شيماء:صحيح أمشي باروح أتصل له.
.....
جواد و هادي وصلوا بيت أبو جواد على طول راحو غرفة جواد...هادي عزف على البيانو عشان يذكر جواد بالمقطوعات الموسيقيه الي نساهم.{هادي أطباعه زي جواد لأنهم امصاحبين بعض من أيام الطفوله ماتفرقو عن بعض الا لما سافر جواد و كان يكلمه كل يوم في الماسنجر}
سمعو الأذان راح جواد يتمسح عشان يصلي.
شيماء دقت باب غرفة جواد عشان تعطيه الحلويات و العصير بس الي فتح الباب هادي{شيماء كانت متغطيه للأحتياط}
شيماء:السلام عليكم.
هادي:وعليكم السلام.
شيماء قلبها اطبول:وين جواد
هادي:جيبه عنش جواد يتمسح.
شيماء عطته اياهم و كانت بتروح بس هادي نادها.
هادي:شيماء لحظه أشوي.
دخل الغرفه و رجع لها.
هادي يمد لها البايسن المثلج:جواد مارضى يشتريه لش فشتريته أنا.
شيماء مستحيه: ساكته
هادي بنظرات تقتل:أفااا اترديني مايسوى علي غير بايسن.
شيماء شكلها فاضحنها:لا مايحتاج.
هادي مسك ايدها و عطاها أياه..أسف على الحركه بس أجبرتيني عليها..دخل الغرفه.
.....
توقعاتكم ياحلووات
